要係度從新開始喇

媽媽走左十年喇

舊曆七月十四係媽媽死忌

十年 媽媽已經走左十年

我真係唔覺得媽媽走左咁耐

佢一直係我心入面無離開過

我日日都會好自然咁想起佢

好想飲媽媽煲o既青紅蘿蔔湯

食佢拿手o既煎鑲鯪魚

有時會諗起佢點幫我湊大亞大少爺

兩婆孫沖涼玩水玩到成身濕晒好搞笑

有時又會諗起同佢shopping個開心樣

又或者會諗起佢食榴槤個餵食樣

有時行街見到d靚衫會好有衝動想買件送比佢

每年母親節同事會呻唔知邊個衰人發明母親節

累大家破財買禮物又迫餐死去食飯

但係佢地又會興高采烈咁研究買咩好去邊度食野好

我   真係好羨慕佢地

(還幸我重有個milk milk)

 

世上最最最愛錫我地o既就係父母

呢份無私o既愛我地要好好珍惜

朋友如果妳雙親依然健在

多多珍惜與他們共聚的時光

否則終有一天你會後悔自責

請相信我這個過來人的話

 

戚戚焉

今個星期第二次返大陸做野
每次朝早經過火車站
都會見到D公公婆婆係度收報紙
洛馬洲站有時會有架車仔放係度
應該係屬於一個伯伯嘅
咁乘客經過就會將果D睇過嘅免費報紙放落去

岩岩係火炭火車站
當我上自動電梯後
向上一望
見到個婆婆係電動樓梯度
攬住一大堆報紙 紙皮同汽水罐
果D報紙左跌右漏
婆婆唔顧危險
搖搖擺擺咁執
我岩岩諗緊咁好危險
佢就成個跌低左
係成個瞓低左係條電動樓梯度
嚇到我呆一呆先識跑上去扶佢
好在有其他人見到即刻幫手
真係好牙煙
婆婆件衫比電梯夾住左
幾個人幫手終於扶起婆婆
我忍唔住同婆婆講
你咁好危險嫁
婆婆無出聲
個樣好無奈咁

唉 究竟點解
一把年紀重要為生活奔波
公公婆婆年青時都有為社會出過力
點解重要佢地彎住腰執紙皮
我唔知係邊個嘅責任
只係知係呢個比大財團
比地產商䁠到盡嘅香港
有好多無奈不公同哀歌
並且已沒有明天及希望

已經到左落馬洲站
要落車喇
心有戚戚焉

Manuka honey

因為有敏感,

所以一路都食開康維他既manuka honey

點知早前消委會測試左佢地有殘餘農藥

咁梗係唔想再食啦

因為我會買埋比老爸食

所以屋企重有三樽未開

於是打去買開果間健康食品店查詢可唔可以退貨

(Health iShop,健康生活專門店)

佢地起初係咁話消委會既測試方法太舊
d蜜糖根本無事

講左一大堆門面說話

我都話想退貨唔想再食

於是佢地話可以退不過要有單

咁我話我係經會員買(我妹妹係會員)

你地電腦有晒我地買野記錄

佢地居然話無賣貨記錄

只有會員資料
咁你地平時點幫會員計積分呀
佢地依然係話無記錄

咁我咪搵單囉

比我搵到張舊單

再打去問又變左喇

話兩個星期前買先會退貨

我話康維他專門店都肯無單退啦

點解你地唔肯

佢地居然發難話唔肯定我d 蜜糖係幫佢地買嫁喎

我話乜你當你地d客咁衰格亂屈你地嫁咩

第二 你地自己賣既貨無識別架

第三你地買野唔係有lot no嫁咩

點會識別唔到
除非你地d貨來源有問題啦

點知果店員係咁話我為難佢

既然佢咁講即係唔想負責

其實佢地只要講點都唔會退貨咪得囉

而家我好似比佢玩左一餐
傻婆咁係咁搵單

算啦 以後都唔會幫襯呢d水貨店

早餐

習慣要上大陸做野就一定要去食個早餐
今朝去左沙田新城市廣場翠華食
唉 29蚊一個早餐
份量細 都唔緊要喇
最慘係唔好食用料差
脆豬唔脆
米粉好多粘埋一堆又無味道
還幸杯檸水都重ok
翠華上左巿之後分別係唔同地方食過幾次
都係失望
以後應該唔再幫襯

囝囝生日- 唐閣

有人話生日果日係母難日
我自己就唔係咁諗
囝囝出世果日係我最開心o既一日
果日o既痛同開心依然歷歷在目
(其實真係好痛嫁, 但係痛完又好開心好自豪, 好慶幸曾經歷此痛)
亦令我一生都有左唔同o既意義
7月囝囝就26歲喇
時間過得真係好快
今日大老爺同佢提早慶祝
我地揀左去尖沙咀朗廷酒店唐閣飲茶
(因為亞大少爺最近晚晚唔係做野就約晒人)
樣樣都好好食
特別係乳豬片同鮑魚酥
而且環境清靜
服務非常好

飲宴

正在飲宴途中
 真係好怕去飲
更怕同D三唔識七
又或者果D九年都唔見一次嘅親戚坐埋一台
無話題又要懶客氣
亞仔，你有機會結婚
最好唔好搞D咁嘅野啦

大好人明哥

細個果時屋企好窮
窮到三餐不繼
媽媽更因此受盡親戚白眼
經常被人冷言冷語
更過份係媽媽患重病時
有人叫爸爸離開媽媽
費時比媽媽拖累

但亦總會人間有情
果時有位隣居殷太
成日都會囉d蛋呀米呀比媽媽
重會講 : 我買多左食唔晒
你幫我食d啦, 唔好晒左佢嘛
幫人重要顧人感受
何其難得

當時我好細
但所有恩所有惡都睇得好清楚
所以由細到大我都會教個仔
人人生而平等
只係際遇各有不同
窮絕對唔係罪
呢個世界無人有資格睇人唔起
相反當有能力時
我地一定要關顧社會上有需要o既人

早幾日出左花紅
數目都好理想
今日就去左深水埗北河燒臘飯店明哥果度
買左一d飯卷麻煩明哥幫我派比d公公婆婆

明哥真係一個大好人
佢飯店d"送"菜有好多款
個賣相都非常吸引
佢話要比多d選擇街坊
由朝做到晚o既佢個樣好攰
但係重同我講話要趕住去囉生果同 粽
因為有人送左千一個生果同 粽出泥
佢呢幾日要去派比d老人家同露宿者
出心出錢出力去關心人
真係值得我地向佢致敬

米漢堡續集

同事試過我買D米漢堡之後
覺得好好食
(我就覺得好食, 但又唔係好食得好緊要)
於是食lunch果時就去左city super入貨
佢地傻左
四個人買左24盒

米漢堡

又一隆重介紹
米漢堡
即係用米夾住d豬肉做漢堡包
我家少爺好鍾意食
買左幾盒比同事試
佢地都話好食
另外有牛肉餡
不過無試過
賣19蚊一個
會員9折
即係17.1
價錢都係偏貴少少
男生食一個係唔夠飽
女生好勉強都可以既

台灣即食麵

星期日同朋友行街
係間台灣食物店度睇到一包即食麵
嘩! 賣成28蚊
於是我就問店員:
豬頭 : 個麵有咩特別, 點解賣咁貴?
店員 : 呢個麵你實鍾意食, 劉德華都話好食
豬頭 : 下~~我都唔知我同劉德華o既口味一樣, 你點會知嫁?
店員 :  佢食慣好野嫁嘛, 佢都話好食, 咁梗係好食啦
豬頭 :  咁你唔比佢食慣晒d好野, 食到d難食o既野先覺特別咩..
店員即時行開左無再理我 

 不過最後都係買左一個試
都幾好食, 如果佢唔係賣28蚊的話~~

多點包容

如果有一日

囝囝同我講

亞媽 我鍾意左個男人

我會好唔開心

唔開心係擔心佢條路會好難行

香港係一個國際大都會

表面好似好開放

實質就非常保守

成日聽到人開口死基佬

埋口死基婆

極盡歧視

實在唔明

人地既性取向點解會關外人事

人地攬住個同性對外人有威脅咩

佢地阻住個地球轉咩

還是唔抨擊下同性戀者

D衛道之士就會無咩野做呢

好多同性戀係天生既

唔係佢地想揀呢條路去行

係個天比左個錯既身體佢地

叫佢地去鍾意一個異性

就等同叫異性戀者去鍾意一個同性

想想叫我攬住個女人KISS

諗起都打冷陣啦
將心比己 點解要歧視佢地呢

不過先天又好後天都好啦

都希望呢個社會真係多D包容體諒同接納
不同思想不同膚色都活得自由開心就最好喇

還剩下什麼

年青果時好鍾意行街行商場
無錢買睇下都開心
因為以前d商場間間店舖賣o既野都唔同
好多野睇 行得好開心
無錢買商場野
行街邊舖仔都買到好野睇到靚野

近幾年對行商場完全無晒興趣
一來年紀大無咩興趣扮靚
(扮極都唔靚都費事"晒"錢")
最大原因係間間商場都賣名牌
行沙田同又一城有咩分別
行圓方同行ocean centre又有咩唔同

最近重衰
連街都唔想行
果d小型食店同舖仔無晒
條條街都係
連鎖快餐店
連鎖藥房
連鎖化妝店
連鎖名店

香港除左剩低地產霸權外
還剩下什麼呢

祝福

每次經過石硤尾地鐵站
我總會想起你
二十二年
我地有二十二年無見喇
你好嗎
最後一次見你
你已有兩位千金
一向想要個兒子的你
可有心願達成
千言萬語
化作一句祝福
願你永遠生活安好

團年飯

年廿九爸爸妹妹泥我家團年
一早去街市買餸
人山人海不單止
d餸菜貴到...
問一問價幾乎嚇到心臟病發
幾經辛苦行左四轉先買晒d野
即刻煲定湯
再等我家老爺放工煮餸
搞左大半日
終於整好一餐
好在一家人食得好開心
點辛苦都抵啦
(如果尋晚果餐媽媽都係度就美滿喇
媽媽, 祝你新年快樂!
我地個個都好掛住你呀!)