濕疹

今年出濕疹出得好緊要
有無網友知道邊個醫生醫濕疹好
可唔可以介紹下
或者有咩方法可以醫
麻煩幫下手
真係好辛苦

去. 留

最近工作得頗不開心
自問能力已去到盡頭
但老板永遠覺得你是無限的
事實自問在某個範疇做得未如自己理想
因已超出我的能力
最可悲的是孤軍作戰
沒有同事可幫得上忙
亦休想上司扶你一把
老板欽點你去做
有事卻不撐你

早在去年已想辭職
但以我這把年紀是很難找到新工作
就算找到薪金一定比現在少一大半
但人生是否不該只向錢看
不向錢看我的退休計劃怎辦

去或留 考慮中

新囝

宣明會寄左我新助養小朋友o既資料比我
係一個四歲半住o係雲南o既小男孩
當我打開助養者手冊見到佢張相果一刻
心情好開心好溫暖又有小小激動
同之前助養非洲小朋友心情好唔同
第一眼就喜歡呢個小朋友
囉住佢張相係咁問我家老爺同少爺
"係咪好可愛? 好可愛呀可"

縱然跟"國內同胞"有很大文化差異
價值觀亦不盡相同
但 不竟我是一個中國人

我係度成日都講助養
唔係想有人覺得我有愛心
出錢有何難
無私咁付出時間
真心真意關懷陌生人
果d人先係真正有愛心
而我只係想有多d人知道
作為一個助養者其實係好開心
我地只係付出好少
但係心靈o既滿足係好大

地球o既資源本來係屬於每一個人
幸運地我地身處於資源分配得多o既香港
咁好應該將多出o既分返d比資源少o既一邊
助養小朋友不但可以改善佢地o既生活質素
更係可以改變兩方o既生命質素
以生命影響生命
呢種影響係雙向o既

又多一個

早前在祈禱中受到感動
決定再助養多一個小孩
總覺得世界上所有小朋友都應得到愛護關懷
所以前兩個小朋友都沒有刻意去選擇性別及國家
結果兩個都是女孩子
一個在莫桑比克
一個在埃塞俄比亞
今次特意要求一個中國的男孩子
不竟我是一個中國人
以前一星期總有三四天會到太興食一個豐富早餐
為慳點錢將會減到一星期一次
哈哈 真好
吃得茶餐廳的食物太多都不是一件好事
今次既可多一個兒子又對身體有益
雙贏

沉重

今日係假期最後一日
同我家老爺約左老爸品茗
可惜一打開報紙
心情變得沉重
希望生者早日身心康復
死者主懷安息~

老公生日快樂

明天是我家老爺生日
今日提早同佢食生日飯
個仔揀左朗豪酒店o既明閣
係一間二星米之蓮中菜館
四個人食左二千蚊

呢餐我家老爺食得好滿意
因為個個菜都好好食
但係我就有少少肉赤囉
不過最緊要老公開心
生日快樂呀老公

仁醫---黃樹德醫生

香港叻o既醫生好多
但係仁心仁術o既又有幾多呢
有d外科醫生一個小手術已經收幾萬
大手術要幾十萬
醫生醫術了得收得貴我地唔可以話佢有問題
係自己比唔起錢絕對唔關人事
但係嚮呢個咩都向錢看o既世界
醫術了得而又肯照顧窮人o既醫生
就值得我地向佢致敬

當年妹妹有病幫佢做手術果位黃樹德醫生
真係一個超超超好o既醫生
佢做手術非常了得
但係就收得一d都唔貴
重可以講係平

早兩日見過佢
問左一d手術收費
佢答左一句我非常欣賞敬佩o既說話
黃醫生話 : 我o既收費一向都係普羅大眾負擔得起o既
其實以黃醫生o既醫術
佢可以收天價
但係佢由診金到手術費都收得好平
如果香港多幾個呢d醫生
真係窮人o既福氣

黃醫生, 我係度衷心向您致敬
您千祈唔好咁早退休呀
我會為您祈禱
希望您長命千歲
繼續幫多d窮人

PS : 如果黃醫生您睇到呢篇野
您估唔估到我係邊個呢?
就係果個好煩o既兩姊妹囉

老細即係老細

我公司工作時間係朝9晚5點半
最初入職果一兩年都可以準時收工
到公司發大左就唔得喇
早10年就最忙
經常8點9點先收工
11點幾未走得都唔係奇
亦試過上大陸開會時間可以係2點
半夜2點
近2,3年又好少少
多數7點幾最遲9點
不過9點都好少喇

有一次同老細食飯
傾開有晚睇到新聞報導左d乜乜乜
我老細好認真咁問我
點解你可以睇到電視新聞報導嫁
我知佢想問乜
即答 : 老細, 我唔係睇6點半新聞
係睇11點o既夜間新聞呀

其實我老細對我地好好
有盈利一定有花紅
呢十幾年我地可以出14-16個月糧
聖誕節一定有份大禮物
(例如ipad, 名牌手袋等等)
但一講到工作時間就....唉

奶奶媽咪 ?

有同事問我如果個仔結左婚
會想個新抱叫自己做咩
因為佢有朋友個新抱唔肯叫佢做媽咪
所以搞到好唔開心

我都未有新抱
唔知第二日會點嫁喎
不過而家心態係
人地嫁你個仔又唔係嫁你
佢鍾意同妳熟梗係最好
有d人係鍾意同妳保持少少距離
叫奶奶又好
媽咪又好
叫我豬頭姐都無所謂
有人會覺得媽媽得一個
叫第二個做媽媽係叫得好唔自在
咪由得佢囉
最緊要個仔同新抱相處得開心
老人家應該識做唔好搞咁多無謂野

有朋友呻點解個新抱咁對佢亞媽
但係又唔係咁對我o既
買咩咩比佢亞媽但係只係買d咁o既野比我
唉 自己問心對自己亞媽好d定係對奶奶好d丫
唔偏心亞媽果個都有病嫁啦
既然係咁點解要搞到自己唔開心
年青果班又唔開心呢

放開d啦奶奶們

價值觀

近年好少買衫褲鞋襪
有d衫著左成十幾年都照著
我大姐(即我老頂)就最睇唔過眼我咁
成日都話我唔顧身世
我d衫又無穿無爛而且乾乾淨淨
做咩唔著得喎
(咁要開會見客果日我識著好d咪得囉)
大姐教訓我話買衫係女人最大樂趣
扮靚d就係對自己好d
佢話我而家咁即係對自己唔好
佢話如果佢唔買野就會失去人生目標
下~~唔係掛
怪唔得佢屋企成百對鞋幾百件衫都重要成日買啦
原來係佢不斷尋找緊人生目標
大家價值觀唔同我唔會同佢爭論


有時我會諗
到左我地d咁o既年紀
著件靚衫真係會改變左外貌咩
唔好自欺欺人啦
咪又係老婦一名
年青果時都試過用半個月人工買一件衫
而家諗返都覺得白痴
人越老越明白內在比外在更重要
錢應該用係有價值o既地方
而家d衫咁貴
買一件夠助養一個小朋友兩個月啦
有錢不如助養多兩個小朋友
令到別人生命質素變得更美麗更有價值啦

豬頭姨姨

每次, 係每次
去完江西出差
返到香港實病
對上一次發燒
今次變左豬頭
已經第三日喇
幾時先還我本來面目

乾乾淨淨

早前因為便便有血
比醫生勒令入醫院檢查腸胃
一聽到要入院已經
重要三日前唔准食菜同生果
照o既前一日只可以食白粥
尋日終於要入院
夜晚7點開始飲潟藥
兩個鐘之內要飲兩公升水
結果成晚潟左十幾次
痾到脚又軟pat又痛
咁大個人最乾淨係今次喇
因為呢個檢查要成兩萬蚊
係咪裡裡外外連荷包都乾乾淨淨丫
可能痾得太多
成晚個口都好乾 (12點後已經唔可以飲水)
真係幾辛苦
今朝一早入手術室
打麻醉針果時痛到呢...
而家隻手淤晒
好在照左只係有少少慢性胃炎同埋有少少內痔
都好, 本身都諗住出年25對果時要檢查
而家提早做就早一年安安樂樂啦

派糖

每年我收到稅單都會好肉痛
但係如果你問我贊唔贊成退稅
我係非常唔贊成
一個政府o既稅收係要用泥建設社會
應該係要有計劃"長遠"建設社會
市民無論上中下都生活得好
有何須退稅呢
派糖只係一個唔負責任o既政府先會做
我地所住之地
老人問題
醫療問題
教育問題
就業問題
住屋問題
雙非嬰兒問題
數之不盡
點解我地個政府唔好好咁正面解決
寫到呢度唔想再寫
唔係無野講
而係對呢個無能政府有太多控訴(或者呢個政府o係果d地產商同大商家心目中係好有用)
都唔知點講好
亦講到個頭頂開始出火喇


PS : 好欣賞黃子華講 :
香港分三層
下層 : 無產
中層 : 中產
上面果層 : 係X家剷

集體加價?

今日第一日返工
去快餐店買早餐
早餐每款加左兩蚊
同事話食開果間麵包店每個包加5毫
中午叫飯盒又加左兩蚊一個
我係呢區返工都有成17年
未見過咁多食市一齊加價
同事講笑話梗係過年前所有食市一齊開會
集體加價喎
其實早在最低工資實行之後
好多食市已經加左價
而家又再加
唉點算好呀